سارة حمود: “يا الله شو بكره الضاحية!!”
سارة حمود: “يا الله شو بكره الضاحية!!”…
كتبت سارة حمّود:
هيدي الجملة يلي كنت ربّح أهلي جميلة فيها كل ما إجي زورن… كوني أنا شخص بحب الرواق، سكنت بمنطقة رايقة. كنت إكره عجقة الضاحية وضجتها والموتويات يلى متل النمل.. صريخ هون وعبقة هون وخبيط هون.
هلأ… بسحب كل كلامي وبقول “قومي من تحت الردمِ”.. قومي فيقي من هالخبيط… اكسري الصمت يلي واقع عليكي، وتعطري بعطور نسائك بدل رائحة الدم. قومي طوشينا بضجتك وعجقتك. خلي الموتويات تسكّر الطريق وتعصبنا بدل ما تكون ماشية تصور إنهيارك… قومي بدعوات الأمهات والحجّات يلي وجودن ببيوتك بركة بحد ذاتها. قومي سلمي على جنوبك وبقاعك وقوليلن “قوموا، منرفض نحنا نموت، قولولن رح نبقى”…
سامحوني يا أهلي إني كنت إتخلّق بس تقولولي تعي وقلكن دخيلكن تعوا إنتو ما إلي جلد على عجقة الضاحية. ما كنت عارفة قديش هي غالية على قلبكم. هلأ عرفت…
سامحيني يا ضاحيتنا كيف كنت إهرب منك وما حبك، ما كنت عارفة إني بحبك إلا لما شفتك عم تاكلي ضرب من ظالم لمظلوم… إنتي وطن لأهلي وناسي وشعبي و أهل بلدي. إنت شقفة من لبنان يلي هو قلبي وقلب كل لبناني. يعني إنت شقفة من قلبي.
سامحيني إني ظلمتك… إنتي بغلاوة جنوبي يلي ريحتو هي أوكسيجني وهو فخر انتمائي وبيحلفوا بعنفوان أهلو. إنتي بعزة بقاعي يلي بيحلفو بعزة أهلو.
سامحيني يا ضاحيتي، هلأ عرفت إني بحبك… هلأ عرفت!!